【原創】笨狼讀書

benojan

本篇首 | 下篇：笨狼進城

　　一隻笨狗頭虎，獨該頭僵森林裏嘸告路數爻，忖起講讀書去。學堂裏馨多箇小朋友，肯定味道顯喈。
　　隻笨狼趒到學堂裏，坐小朋友裏向，聽先生講課。

　　第一堂，先生教大綱人學詞語。先生用紅顔色箇粉筆僵黑板裏“蘋果”兩箇字寫起，搭小朋友講：“該蘋果。”
　　“勿是喈，蘋果圓磥磥、紅冬冬、甜美美喈。”隻笨狼第一該徛起反對來爻。
　　“是啊，笨狼講得是喈，我夷蘋果都喫過箇，曉得渠怎兒該。”各海小人聚隊講。
　　“該是‘蘋果’兩箇字，亦勿是老實箇蘋果。”先生氣起講。
　　“為解某蘋果勿是老實箇蘋果勒？”箇敳大狼亦問。
　　“老，蘋果勿是老實箇，我夷學來解某用場勒？”各海小人亦聚隊問。
　　“搭爾夷講不靈清，我等詞語不學爻，我等來講故事！”先生講。

　　於是，先生講小紅帽箇故事撥小朋友聽，小朋友夷安安靜靜箇聽牢，聽得老認真，箇驀臨頭一箇“尖聲”孬過起爻：“勿是馨喈，海都造謡箇，小紅帽我根本朆喫著。”
　　“嘸數爾伯妝著爻。”一箇小朋友講。
　　“我爹海不妝喈！”
　　“箇伐嘸數爾爺爺咸？”
　　“爾太公阿嘸數勒？”
　　笨狼忖忖，不響爻，因為渠確實不識渠爺爺搭太公到底像喫小紅帽海壞事做著過朆。
　　先生打算搭笨狼講，故事不一定都老實，亦嚇渠不懂，先生便馨講：“事爻，我等昶故事不講爻，我等去上體育課去！”

　　笨狼搭小朋友夷趒到大操場裏，跑道耷隊排起。先生謳大綱人跑步，講解人躃得頂快，解人便體育最好箇學生。
　　“預備，跑！”
　　先生擊講，笨狼便搭箭向射去爻。唻跑道彎頭耷渠曉不得彎，怪得量橫拔直向射出大操場，翻過田野，躃轉大森林裏去爻。

上海闲话abc

绝对精品打造。能有配音就更加好了。