【請教】大家跟帖翻譯出各地吳語版本吧

Terrist

下面是北语原版：

离考试越来越近了，还有4门考试，无心复习，因为她似乎故意躲避着我，弄得我都不好意思了。和她在一起复习效率超高，可是被人看到说法不怎么好听，不要给别人平添麻烦，又想和女生多呆一会儿，好复杂。不去想，自私一点，可是不是长久之计。没办法，你说怎么办？做人有时候只是想快乐一点，世界太复杂，很多原先简单的事情，变得好复杂，复杂到无法进行下去。一个老乡说“是你的总归是你的，不论她现在在哪里。”说的是挺有道理的，可是坐起来一点也不简单。人都是讲究现实性的动物，有时候真的是没办法，日子总要过下去，不要总是在幸福的假象边留恋，不要每天老是想这种事情，后天又要考试了，赶快把心静下来，放到学习上去，考试挂太多以后怎么办呀……今天时间完全浪费了，玩了一天，还不是因为她不在我身边嘛，不然早就把离散数学复习得很好了。朋友们，我要专心学习了，我的校內，我们暂时先再见吧！

大家跟帖翻译吧，加油！

［ 本帖最后由 Terrist 于 2009-02-10 15:55:00 编辑 ］

Terrist

定海鹹話Version

再眼要放假啲嘞， （再眼：快要…，差点…，啲：表达不临近的将来时态。）
考試還有嘚4門， （有嘚：有）
唔心相複習，
因為佢好像即末子介開始避伢啲， （佢：实际定海话写作「伊」。即末（子）：今天。…介：从…。啲：表示现在时时态。方位是「我处」。）
弄勒伢儂自家啊弗大好意思。 （伢侬（我侬）：也可以用「伢（我）」）
搭佢介做隊複習效率嘚高猛喇， （搭…介：和…、同…。做队：一起。…猛：很…）
可興撥人家看見話法唔好聽氣， （可兴：可是。唔…气：不太…）
廢搭人家增加唔必要嗰麻煩， （废：不要）
亦忖再搭小娘介多頓眼一尚， （亦：又。忖：想、希望。顿：待、住。一尚：一会儿。一段时间）
複雜猛。
廢去忖，
自私眼， （…眼：…一点）
可興時介介嚒亦弗唻噻。 （时介：总是、一直。介嚒：这样。唻噻：行得通、可以）
唔告辦， （唔告：不能、不可以）
咋弄侬話？ （话：说、讲）
做人候時總只忖快樂眼， （候时：有时。总只：只是、只不过）
世界忒複雜，
交關多一開始簡單嗰事體， （交关：相当、很）
變勒委實複雜猛， （委实…猛：非常…）
複雜勒唔告進行落去。
一個做頭人話嘞“喺侬嗰總歸喺侬嗰，但便佢人來阿裏噹。” （做头人：老乡。但便：不论。噹：表进行时或完成时，方位为「我处」。）
講勒一眼啊勿會錯，
可興做起來渾身唔沒介省力吤。 （省力：方便、容易。吤：语气词）
人統喺講究現實性嗰動物， （统：都）
候時真式唔辦法， （真式：真的，实在是）
日子總要過落去東西， （…东西：肯定句的一种用法）
弗好時介搭弗現實嗰幸福假象邊頭趒趤啲， （趒趤：空闲无所事事）
莫每日時介忖眼介物事， （莫：不要、不許）
後日亦要考試啲嘞，
豪掃心安靜落來， （豪扫：快）
諳勒學習高頭去， （谙：放。高头：上面）
考試特猛科弗及格下日派謳伢人咋做做喇…… （特猛…（+量词）：好几…（+量词）。派：准备…；反问语气。讴：叫）
即末子时节整個浪費了勒呐， （时节：时间。整个：彻底。…了：完成式的其中一种用法）
nawo勒一日， （nawo：玩）
喺還備佢唔沒搭伢邊頭來啲喇， （还备：要不是、都怪、因为。边头：旁边。来啲：在（方位是「我处」））
反則離散數學老早百年複習勒好猛啲嘞。 （老早百年：早就）
大家，
伢要好好交複習去嘞， （好好交：认真、好好地）
伢嗰校內，
阿拉暫時性介拜拜仔嘞先！ （…介：…地。仔：祈使的一种用法。）

［ 本帖最后由 Terrist 于 2009-01-04 12:46:00 编辑 ］

benojan

台州玉环苔山版本：


放假祗1近起爻2，考試還缺得3四門湊4，嘸5心複習，因為佢6昶7搭個8著意9弗屑10著我響，馨11妝12起我也弗好意思。搭伊做隊13複習效率弗怎奈個14高，不過馨䜒15人家望16著宿旁17慢18講講亦孬19聽，嘸出20畀21人家多粒22嚕蘇23爻，肚裡亦值得24搭女同學僵25僵長久滴26，亂險27。懶忖28著佢，想自私滴，馨妝落去湊無用29個唉。嘸告用場30，爾講講響31怎奈32妝妝好？做人有兩擊33祗想快活34滴，世界忒35複雜爻，無數36事幹37起頭38省力39個，後晚40變起來弗怎奈個嚕蘇，曉弗得41怎奈妝妝爻。一個同地方人講“是爾居42個物事43肯定會爾居，弗管渠昶來何橫44”講講是是險45，做做叻46？嘸馨省力吤47！人都是講現實個動物，有擊把48老實49要弗得50啊，日子約51過落去個總52，嘸出賴53旁弗現實個幸福裡向54弗趒55出個總。嘸出日加日56祗57來旁忖個許58物事，後日還約考試湊，快滴靜落來，真功直認59學習啊。考試弗及格門數忒多轉日60嘸出做人吤……今日整長日61浪費爻，嬉62一日爻，因為嘸來我邊裡63。弗若64離散數學千早65複習好險爻。大家人66，我昶約認真複習去爻，我個校內網，暫時搭爾侇67再見爻！


注釋：
1. 祗：越來越…。
2. 爻：完成時，相當于普通話的“了”。
3. 缺得：缺，非本字，音“挈”。
4. 湊：放句末表示“還，再”。
5. 嘸：沒。
6. 佢：第三人稱，這裡是“她”。
7. 昶：現在。
8. 搭個…響：好像，跟…一樣。
9.著意：故意。著，非本字。
10. 屑：音“雪”，理睬。
11. 馨：這樣。
12. 妝：做，弄，干。
13. 做隊：一起。
14. 弗怎奈個：非常。
15. 䜒：叫，讓。
16. 望：看。
17. 宿旁：在那。旁，那。
18. 慢：引出結果。
19. 孬：“弗好”的合音字。
20. 嘸出：不能。
21. 畀：給。
22. 粒：點。
23. 嚕蘇：麻煩。此句意思是：不能再給人家添麻煩了。
24. 值得：更愿意，想。
25. 僵：呆在。
26. 滴：點。
27. 險：又作“顯”。放在句末表示“非常”。
28. 忖：想。
29. 無用：不行。
30. 嘸告用場：沒有用。嘸告，沒有，沒事。用場，用處，用途。
31. 響：非本字，“…看”。疑為“相”之訛音。
32. 怎奈：怎么，如何。
33. 有兩擊：有時候。擊，常作“記”。
34. 快活：高興。
35. 忒：太。
36. 無數：很多。
37. 事幹：事情。
38. 起頭：剛開始；剛才。
39. 省力：簡單，輕鬆。
40. 後晚：後來。
41. 曉弗得：不知道。
42. 爾居：你的。我居，我的。“居”又作“該”。
42. 物事：東西。
43. 何橫：哪裡。
45. 是險：很對，非常正確。
44. 叻：語氣詞。相當于“呢”。
47. 吤：語氣詞，“個啊”合音。
48. 有擊把：有時候，一些時候。
49.老實：真的。
50. 要弗得：沒辦法。
51. 約：“要”促化。
52. 總：後置。
53. 賴：糾纏，留戀。
54. 裡向：裡面。
55. 趒：走。
56. 日加日：每天。…加…，每…。
57. 祗：一直。
58. 個許：這些。
59. 真功直認：認真。
60. 轉日：以後。
61. 整長日：整天。
62. 嬉：玩。
63. 邊裡：旁邊，身邊。
64. 弗若：不然。
65. 千早：早就。
66. 大家人：大家。
67. 爾侇：你們。

碧云涛

上海本地話版本
就要放假特，還有得四門科目要考，嘸心想複習，為此渠象煞成心掖忒吾，弄勒吾自家也弗大好意思。忒渠一陶複習效率邪氣高，必過撥人家看見閑話弗大好聽，覅忒人家增加弗必要個麻煩，亦想忒小姑娘道多蹲一眼辰光，交關復雜。弗去想，自私眼，必過長久也弗來事個。嘸辦法，儂話哪恁辦？做人有辰光只想樂惠眼，世界忒複雜，交關一開始簡單個事體，變勒實在複雜，複雜勒弄弗下去。一個同鄉話辣個“是儂個總歸是儂個，隨便渠辣拉何里浪。”講勒是交關有道理，必過做起來一眼也弗便當。人儕是講現實個動物，有辰光真是嘸辦法，日腳總歸要過下去個，弗好一直辣弗現實個幸福假象邊頭留戀個，覅日日念辣是眼物事，後日亦要考試特，豪掃心平下來，擺辣學習浪去，考試弗及格門數忒多下趟哪恁做人啦……今朝辰光全部浪費忒拉特，孛向仔一日天，就是因為渠弗辣吾身邊，弗是恁離散數學老早複習了好透好透拉特。大家，吾要好好交複習去特，吾個校內，伲暫時性告別特哦！

Basatio

我也贴一个吧，金华：

便要考试了，还有4门课要考，无心相复习，因为渠好像择意躲我侬生，弄得我侬都弗好意思了。跟渠徠一起复习效果危险好，便是让别人望着讲起来弗大好，覅分别人多生事干，咦想跟女同学徠一起长点儿时节，真当复杂。弗去忖，自私点儿，时节长了咦弗会来。无办法，侬讲哪亨办？做人有时光便是想开心点儿，世界忒复杂，危险多本来简单猛箇事干，变得亨复杂，复杂到无办法再弄下去。共地方箇一个人讲“是侬箇弗便是侬箇，弗管渠央节徠哪里。”讲箇是有道理猛，一记做起来便一点儿都弗容易。人都是讲现实箇动物，有时光真当是无办法，日子总要接落去过，弗要专门徠幸福箇假象边沿留恋了，覅每日专门忖格种事干，后日咦要考试了，快点儿心静落来，囥到学习上去，考试忒多弗及格以后哪亨办啊……今日儿箇时节统统浪费了，搞了一日，还弗是因为渠弗徠我边沿哇，弗然话老早便分离散算学复习得好猛罢。各位老朋啊，我要去认真学习了，我箇校内，我浪先讲再会起哇！

（第一次做格种翻译作业，临急临时弄箇，有些越发好箇提法可能未忖着，有些词可能有点官，大家先望来起哇）

［ 本帖最后由 Basatio 于 2009-01-03 22:01:00 编辑 ］

bellwu

苏州话：

就要考试快哉，还有4门，呒没心相复习，为兹俚像煞一经特为避开兹我，弄得我也弗好意思哉。搭俚一道复习效率蛮高个，但不过畀人看见兹要瞎讲个，格么覅去帮人家添麻烦吧，亦想搭女同学多登脱一歇，真叫复杂呐。弗去想，自私一点吧，不过也弗是长远之计咓。呒没办法，倷讲呐吭办？做人有辰光只不过想开心点，世界忒嫌复杂，弗少原本蛮简单个事体，变得几化复杂法子，复杂得叻呒没办法进行下去。一个老乡讲“是倷个总归是倷个，弗管俚现在勒啥场化。”讲得是蛮有道理个，但是做起来一点也不简单。人侪是讲究现实个动物，有种辰光真个是没办法，日脚终归要过下去个，覅老是勒幸福个假象旁边留恋哉，覅每天老是想艾种事体哉，后日亦要考试哉，豪稍拿心静静下来，放到学习浪去，老是考豁边么下趟呐吭办呢……今朝辰光统统浪费脱哉，白相兹一日天，还弗是因为俚弗勒海我边浪嘛，本生老早就拿离散数学复习得老好哉。朋友们，我要专心学习哉，我个校內，伲临时先再会吧！

［ 本帖最后由 bellwu 于 2009-01-04 04:02:00 编辑 ］

人人头

苏州话2

要考试快哉，还（ghe）有四门考试，无不心想去复习。俚像杀特（dih）为避开我，弄得我也（gha）弗好意思哉。搭俚一道复习效率蛮高，不（pih）过拨人家看见仔瞎三话四，又（yeh）要得人家添麻烦。心活念念要搭女生多蹲一歇，真个复杂。覅去想，还（ghue）是自私点罢，终归弗是个长久办法。呒手抓路，倷说纳哼办呢？做人有辰光只是想稍微开心点，世界忒复杂，交关本来蛮蛮简单个事体，变得复杂得来，复杂得无不办法做下去。一个同乡讲：是倷个么总归是倷个，随便俚现在来哪（lo）搭。讲得是蛮有道理个，但不（pih）过做起来就弗简单则。人么侪是要想想实际个，有歇辰光真个是无不办法呀（yo）！日脚还是要过下去个，弗令一脚来幸福个假象畔边留恋，覅日逐去想个种事体。后日又要考试哉，豪扫静下心来，摆到学习浪去，考试侪弗及格么乃下来纳哼办啊。。。今朝个辰光么全本浪费脱，白（beh）相仔一日，还弗是俚弗来我身畔边么。弗然是老早就拿离散数学复习得蛮好哉。朋友啊，我要一门心思复习哉，我个校内，伲先说再会罢。

［ 本帖最后由 人人头 于 2009-01-04 10:04:00 编辑 ］

湖州闲话

【湖州東片閒話】

要考試快特，還有4門課要考試，嘸不心思去復習，因為渠像煞要佬【特（dih）為】坢我，弄得我啊弗好意思特。

搭渠辣一淘復習個辰光效率高叻野，必過畀人看到要有嗦話個，弗想討人家惹厭，又想搭丫頭家一淘別相，來得哩複雜啦。

弗去想，自私嘀，介搿弗是長久之計。嘸不辦法，你講哪哼辦？   

做人有辰光（場里）就是想快活嘀，世界忒介複雜，混脫原來蠻省力呱事體，變特複雜煞，複雜到無去進行下去。

一個老鄉講“是你個總歸是你個，弗管渠該歇辣何搭。”講個是蠻有道理個，比過倘若做起來個閒話搿是一嘀啊弗省力。

人儕是講究現實性個動物，有場里真個是嘸不辦法，日腳橫是要過下去個，消（“休要”的合音）常叫辣幸福個假像邊留戀，消日逐想搿種事體，後日又要考試特，豪骚挪心靜下來，放著讀書浪去，考試掛忒介多下通哪哼辦呀……

今朝時間完全浪費脫特，別相特一日，還弗是她弗辣我身邊之故嚒，弗是介吾老老早早就挪《離散數學》復習得蠻好特。

朋友們，吾要專心讀書特，我個校內，伢暫時先再會啊！

［ 本帖最后由 湖州闲话 于 2009-01-06 14:10:00 编辑 ］

百山祖

蕭山話版。
考試蠻蠻近哉，咳有四門工課，复習的心向一嗖嗖啊嗯扭，其像煞要特爲扮我，我啊蠻弗好意思呴。同其一道复習啊蠻好呴，弗過宁嘎看到要話呴.............

特個長哉，弗高興翻哉。

湖州闲话

蕭山話版。
考試蠻蠻近哉，咳有四門工課，复習的心向一嗖嗖啊嗯扭，其像煞要特爲扮我，我啊蠻弗好意思呴。同其一道复習啊蠻好呴，弗過宁嘎看到要話呴.............

特個長哉，弗高興翻哉。 ...
百山祖 发表于 2009-1-4 12:56 ↩️

介懶惰！
吃生活特要！