【原創】決鬥（上海吳語作文）

上海闲话abc

決鬥

是廿一世紀頭哴西歐某國一法庭哴辣嗨審理一樁刑事案件。事體是董卓跟呂布兩位表兄弟辣公園裡向決鬥，董卓被刺成重傷。
兩位表兄弟個家族律師丁建原辣嗨法官曹操面前拼命打圓場，呂布跟董卓兩個表兄弟是一家門個，兩兄弟白相相個，絕對沒置人死地〔tzyhgnin-syhdih〕個想法。董卓受傷個事體完全是事故，兩兄弟接受庭外調解。小事體一樁，請法官大人眼開眼閉大事化小爲好。
法官曹操有眼搞勿懂狀況，聽說是兩個表兄弟真刀真槍決鬥是為仔董卓個女人貂蟬，就直接請貂蟬出庭做證。貂蟬輕移碎步走到庭前，曹操一看：面前迪個美女，一頭金髮披肩好似陽光流洩〔siq〕，一雙碧眼如同兩塊藍寶石，嚓嚓放光，楊柳細腰，隨步伐節奏輕輕扭擺豐乳翹臀。貂蟬立到證人席，輕啓朱脣露出兩排碎玉白牙，開口如同鶯燕啼唱。迪能一個小娘，難怪兩個嫡親表兄弟要反目成仇。貂蟬自我介紹：法官先生，小女子叫貂蟬，董卓跟呂布兩表兄弟確實是爲我決鬥個。
法官問：儂跟兩位當事人是啥個關係呢？
貂蟬答：董卓是我原配老公，伊今年四十歲，我廿六歲。呂布是董卓個表弟，今年三十一歲。我夫家跟娘家儕是貴族，按照傳統是勿能跟外人通婚個。我跟董卓是娃娃親。為仔我出生迪一天就指定爲伊個老婆，樣樣儕是現成個，董卓也從來沒追求過我，沒甜言蜜語，也沒鮮花禮物。阿拉是一年多前頭正式結婚個，董卓個表弟呂布來喫喜酒，箇能阿拉就認得了。沒想到呂布大模大樣花我。法官先生，要曉得我從來沒正經談過朋友，本生以爲自家迪輩子就迪能了，呂布舉動當然讓我心別別跳。但是阿拉迪牌貴族家庭是根本勿可能離婚個。
曹操順勢問：格嚜，儂出軌了？
貂蟬勿慌勿忙否認：絕對沒個。我還是保持對我老公忠誠個。我拿呂布個舉動儕一五一十告訴老公了。勿相信儂可以問董卓個。
旁邊檢查官王允插了一句：貂蟬，儂事發前三個號頭幫董卓買個人壽保險，數額高達一百萬歐元。迪個正常伐。
貂蟬勿慌勿忙答復：是伊自家要買保險，我擡高了保險價鈿而已。最後還是伊拍板個。勿是我買個。像我老公迪樣個身價個人，一百萬保險勿稀奇個。
法官曹操和氣個講：好伐，儂請坐回到旁聽席哴。請董卓跟呂布立到審判席前。

董卓講起來剛剛四十歲，明顯見老，已經謝頂，額骨頭哴有幾道深深個電車路，中年發福迭起仔一隻將軍肚，畢竟貴族出生，儘管長相推扳舉止倒也文雅。董卓左胸還有紗布繃帶，伊拼命立立挺，根本勿像喫了敗仗。呂布立辣伊表哥旁邊要高出一頭，三十歲出頭，相當神氣，是個邪氣精神個漂亮小夥子。立辣伊旁邊個表哥完全變成了陪襯人。

呂布搶先自我介紹，董卓接下去：法官我是董卓，就是貂蟬個老公。貂蟬生是我個人，死是我個鬼。
呂布一聽當時就勿買賬了：儂也好意思講個，儂也勿斥泡尿自家照照。我喏〔noh〕，立辣貂蟬一道再叫天生一對。
兩家頭辣法庭哴又脣槍舌劍〔zenchian-zeqcih〕個決鬥開了。
法官曹操頭也渾了，一拍檯子：㑚兩家頭幫我太平眼，我口頭警告㑚藐視法庭。
兩兄弟衹好相互眼烏珠彈彈，一時勿響了。

法官又問：㑚兩家頭一清老早辣公園裡向真刀真槍決鬥。事體是迪能個伐？
呂布講：決鬥是董卓提出來個。
法官曹操問董卓：儂確實是為仔貂蟬跟呂布決頭個？儂勿曉得儂表弟是花劍冠軍，儂迪個勿是尋死。
董卓立了一立正，老奎個回答：爲仔我心愛個貂蟬，爲了我身哴個貴族血統，死勿足惜。樹活一張皮、人活一口氣。
旁聽席哴一陣噓聲。

曹操板仔面孔講：是伐，請當天公園值班管理員張遼出庭作證。
張遼走到臺前，一本正經個講：出事體個迪日早哴，我上班稍爲早到了眼。我到現場個辰光伊拉兩家已經決鬥仔一歇。我正好看到迪個小白臉一劍鑿辣迪個先生左胸。法官大人，我看苗頭勿對要出人命，所以一步上去要伊拉關脫〔theq〕。我拿出手機打電話報警，迪個小白臉摸出兩張伍拾塊，要我省省。法官先生，人命關天個事體，我哪能好要迪個人命銅鈿。我還是報了警。刻把鍾勿到，救命車拿受傷個先生帶走；警察大隊個劉備、關羽、張飛、趙雲也趕到，迪個小白臉八〇八一帶，拉走了。

曹操轉身問呂布：呂布，儂到底是勿是要殺脫董卓？做啥要買通公園管理員？
呂布神兜兜個回答：決鬥是我伲貴族解決感情糾紛個傳統。決對個目的勿是殺人，決鬥個原則是點到爲止。既然董卓已經見血了，我就是贏了，貂蟬就是我個人。董卓是我嫡親表哥，我絕對沒要拿伊做脫個心想。我以爲是阿拉兩兄弟個私事，所以覅迪個管理員管閒事，所以要伊差路。我也沒想着表哥傷勢哪能。我當時確實有眼衝動，但是絕對沒拿表哥做脫個心想。
旁邊董卓勿買賬：貂蟬是儂個人，只要我有氣儂想也覅想。上趟勿算，啥辰光阿拉再決鬥一次，看我勿擺平儂。
法官曹操又一拍檯子：㑚兩家頭幫我識相眼，我再次口頭警告㑚藐視法庭。

迪個辰光，檢查官王允發調頭了：呂布，孫尚香小姐是儂啥人。
呂布一呆，聲音抖豁：儂問迪個做啥，勿搭界個伐？
王允繼續講：孫尚香小姐話是儂個未婚妻。
呂布語無倫次：隻女人腦子有毛病。
旁聽席哴貂蟬面色一時變得通紅，又變得鐵青，熬勿牢高聲喊：呂布，儂快眼講講清爽呀。
呂布定定神：我跟孫尚香不過是點頭之交而已。
王允穩篤篤個講：好像勿是一般性有數伐。人家好像老爲儂擔心個。辣儂拘留個廿四個鐘頭裡向，孫尚香小姐打了七十二隻電話。開始阿拉也勿想管，後首來實在勿管勿來山。孫尚香小姐講是儂個未婚妻。伊還講：㑚今年六月份就結婚，講阿拉沒理由拘留儂，恐嚇阿拉濫用職權，要起訴阿拉。

旁聽席哴貂蟬鈵勿牢了：呂布，儂女人也忒多了伐。儂跟甄宓〔Tzen Miq〕、蔡琰〔Tsah-Yih〕搞勿清爽，跟大喬、小喬也有一腳，聽說有過個原配嚴小姐。現在又出來一個孫尚香，我老早就懷疑㑚兩家頭搞七念三〔gohtsiq-gniehse〕。
呂布迪記真個慌了，轉身對貂蟬擠眉弄眼，又做手勢：噓、噓。
大廳裡向大家看得清清爽爽，場面相當刮三。
法官曹操高聲警告：呂布，儂淘啥漿糊。覅干擾〔zoh〕審判〔pheuh〕。
醋性大發個貂蟬乾脆臭罵呂布起來：呂布，儂哪能好對我三心兩意，儂對勿起我。儂隻沒良心個。
呂布也勿領份：啥物事，阿拉沒結婚好伐。正宗帶綠帽子個朋友辣此地喏。順手指指旁邊個董卓。還接下去講：良心閒話跟儂上牀個辰光，我心裡寒咾咾個。
貂蟬沒料着〔zaq〕畀呂布迪能鈍了兩句，徹底翻了毛槍：法官，我欺騙了大家。其實我沒經歷戀愛，畀呂布七花八花就讓伊搨着便宜。我是真個畀呂布花進，喫殺伊了。呂布幫我出個主意，讓我拿伊追求我個事體亨八冷打儕告訴董卓，讓董卓心煩意亂。人心煩意亂就容易出事故。但是等仔四五個號頭，董卓也沒出啥致命個事故。伊又幫我出主意，挑董卓寫生死約定，幫伊決鬥。
呂布一聽也毛了：儂覅瞎七搭八。是儂急吼拉吼。哪能事體儕怪到我頭哴。
迪記好，審也覅審了，兩家頭當庭狗咬狗，水落石出了。
原來，情場老手呂布輕輕鬆鬆就拿貂蟬隻嫩頭搞定了。癡情個貂蟬一心嫁畀呂布。本生逢場作戲個呂布敷演貂蟬，就哄貂蟬拿伊叉貂蟬個事體原原本本告訴董卓，講是讓董卓心煩意躁〔tzoh〕出事體；實際想讓董卓管牢貂蟬，伊好跟其她女人去瞎混。貂蟬心急，催促呂布。聽說出了眼小事故個董卓要買人壽保險，呂布想法變了，決心要做就做得殺根。所謂無毒勿丈夫。花劍冠軍呂布要貂蟬擡高保險數額個同時，又想出一招：挑董卓寫生死決議尋伊來決鬥。董卓是完全畀貂蟬捏辣手裏個，真去跟呂布發挑戰書。出事體個當天，還是貂蟬開車子拿董卓送到公園裡個。貂蟬還迓辣樹後頭看伊拉決鬥。看到董卓中刀，貂蟬心裡又有眼過意不去。看到董卓畀救走，又是失落又是慶幸〔chihnyihn〕。

最後呂布、貂蟬畀起訴爲故意殺人罪跟詐騙保險罪。

後記：該文中人名純粹是虛構個。故事情節是根據歐美某地一真實事件改編。